SA isinumiteng proposed Senate Resolution 960, nais ni Sen. Robinhood Padilla na ito ay imbestigahan ng Senate Committee on Public Information and Mass Media kung saan siya ang chairman.
“The imposition of baseless suspension orders on SMNI not only constitutes a denial of due process but also an erosion of press freedom,” ayon kay Sen. Robinhood Padilla.
Nakasaad rin sa nasabing resolusyon na hindi napatunayan ng National Telecommunications Commission (NTC) sa show-cause at suspension orders nito sa SMNI, kung bakit kailangang suspindihin ang operasyon ng SMNI.
Hindi rin aniya ipinaliwanag kung bakit kailangan ang suspensiyon para maiwasan ang “serious and irreparable damage or inconvenience to the public or to private interests.”
Ayon din kay Padilla, hindi puwedeng labagin ang karapatan ng mamamayan sa public information, na aniya’y nakatutulong sa publiko sa pamamagitan ng pagbigay ng mabuting pananaw sa mga isyu na umaapekto sa lipunan.
“[T]hat any attempt to restrict it must be met with an examination so critical that only a danger that is clear and present would be allowed to curtail it,” saad pa ni Sen. Padilla.
Ipinunto rin ni Padilla na malinaw ang Korte Suprema, sa kaso ng Chavez vs Gonzales noong Pebrero 2008, na mahalaga ang kalayaan ng media.
Sa buwan ng Disyembre ng nakaraang taon pinatawan ng NTC ng 30-day suspension ang SMNI dahil sa umano’y paglabag sa terms and conditions ng prangkisa nito.
Ang ginawang basehan ng desisyon ay ang pagdinig sa Kamara na nagsabing nilabag ng SMNI ang tatlong partikular na probisyon sa legislative franchise.
