MALAPIT nang makamit ng Armed Forces of the Philippines (AFP) ang ‘total victory’ laban sa communist terrorist groups (CTGs).
Ito ang inihayag ni AFP Public Affairs Office chief LtCol. Enrico Gil Ileto matapos mapatay si Dionisio Micabalo, alyas Muling, secretary ng Northern Central Mindanao Regional Committee (NCMRC).
Binati ni AFP chief of staff General Romeo Brawner, Jr. ang matagumpay na operasyon ng 4th Infantry Division (4ID) sa Gingoog City, Misamis Oriental na nagresulta sa pagkasawi ni Micabalo.
Napag-alaman na ang grupo ni Micabalo ay sangkot sa karahasan at criminal activities sa bahagi ng Bukidnon, Misamis Oriental, at bahagi ng Agusan del Norte at Agusan del Sur.
Si Micabalo ay nahaharap sa kasong rebelyon, double murder with frustrated murder, multiple frustrated murder at arson, gayundin ng kasong murder at paglabag sa RA 9851 o Philippine Act on Crimes Against International Humanitarian Law, Genocide and Other Crimes Against Humanity.
Binigyang-diin naman ni 4ID commander MGen. Jose Maria Cuerpo II na ang pagkasawi ni Micabalo ay may malaking dagok sa CTG na posibleng humantong sa paghina at disintegration ng criminal activities sa Northern Mindanao.
