BINABANTAYAN na rin ng Department of Migrant Workers (DMW) ang umano’y human trafficking scheme ng mga overseas Filipino workers (OFWs) sa Europe kung saan ang mga manggagawang Pilipino ay sumasailalim umano sa mahabang oras ng pagtatrabaho sa mababang sahod.
Partikular na binanggit ni DMW Secretary Susan Ople ang bansang Poland kung saan ang mga OFW ay naiulat na itinalaga sa hindi ligtas na working conditions.
Kabilang dito, iminungkahi rin ni Ople ang isang insidente kung saan nasa 39 OFW’s ang naging biktima rin ng human trafficking sa naturang bansa.
Ang napaulat na human trafficking ng mga OFW sa Poland ay isa sa mga tinalakay noong Inter-Agency Council Against Trafficking (I-ACAT) na pinangunahan ni Pangulong Ferdinand R. Marcos Jr. sa Malakanyang.
Samantala, isiniwalat din ni Ople na ang Department of Justice ay nangako na tulungan ang mga biktima ng human trafficking mula sa ibang bansa na determinadong ituloy ang mga kasong kriminal sa pamamagitan ng witness protection program.
Nauna nang inutusan ni Pangulong Marcos ang DMW na paigtingin ang kampanya ng kamalayan nito upang maiwasan ang mas maraming naghahangad na OFW na maging biktima ng mga sindikato ng cryptocurrency scam sa Cambodia, Laos, at Myanmar.
