MAGIGING ‘host city’ ang Iloilo sa nalalapit na Central Philippines Tourism Expo (CPTE) ng Department of Tourism (DOT) mula Hunyo 16 – 18.
Ayon kay DOT-Western Visayas Director Crisanta Marlene Rodriguez, ang CPTE ay bahagi ng inisyatiba ng DOT upang mapalakas ang pagbangon ng turismo ng bansa mula sa pandemya.
Aniya, sa 3-day travel Expo ay magkakaroon ng parada ang festival, business-to-business meetings, product presentations, cultural performances, travel exchanges, at ang paglulunsad ng “Bisita: Be My Guest” program.
Dadaluhan ito ng mga stakeholder ng DOT mula sa Western Visayas, Central Visayas, Eastern Visayas, Bicol Region, Cavite, Laguna, Batangas, Rizal, Quezon, (CALABARZON), at Mindoro, Marinduque, Romblon (MIMAROPA).
Sinuportahan naman ni Iloilo Mice Alliance President Joseph del Rosario ang paglunsad ng programa ng ahensiya.
