NAGKASUNDO ang Philippine National Police (PNP) at Indonesian National Police (INP) na palawakin ang kooperasyon sa paglaban sa transnational crime at terorismo sa rehiyon.
Ito ay kasunod ng pulong nina PNP Chief Police General Rodolfo Azurin Jr. at Police Brigadier General Amur Chandra Juli Buana, Secretary ng NCB Interpol ng Indonesia, International Relations Divison ng Indonesian National Police sa Abu Dhabi, United Arab Emirates (UAE).
Ayon kay Azurin, malawak ang hangganan ng Pilipinas at Indonesia kaya mahalaga na mapalakas ang kooperasyon sa pagtugon sa regional security issues.
Kasabay nito, bumuo ang PNP at INP ng standard procedures sa joint police operations, joint training on cooperation ng pamamaraan sa pagsasagawa ng hot pursuit operations sa territorial waters, at alituntunin sa pag-handover ng mga kriminal.
Una nang bumuo ng memorandum of understanding (MOU) ang PNP at INP noong Disyembre 12, 2022 para ipagpatuloy ang pagsasagawa ng maritime joint exercises (PHILINDO JCM and MARLEX), capacity-building training/courses, at security assistance para mapalakas ang anti-crime campaign ng dalawang bansa.
