PORMAL nang umupo si Police Brigadier General Reynaldo Pawid bilang bagong Regional Director ng Police Regional Office (PRO) 8 o Eastern Visayas, kapalit ni Police Brigadier General Vincent Calanoga.
Ang turnover of command ceremony ay pinangunahan ni Police Lieutenant General Patrick Villacorte, commander ng Area Police Command – Visayas sa Camp Kangleon, Palo, Leyte kahapon.
Sa kaniyang mensahe, nangako si Pawid na ipagpapatuloy ang legasiya at itataguyod ang prinsipyo ng Philippine National Police (PNP).
Paiigtingin din aniya ng PRO 8 sa ilalim ng kaniyang pamumuno ang crime prevention, crime solution, at public safety operational strategies na nagbibigay-diin sa 5-focused agenda ni PNP chief Police General Benjamin Acorda, Jr.
Bago maitalaga sa puwesto, si Pawid ay nagsilbi bilang PNP Senior Police Assistant to the Secretary of the Interior and Local Government.
Siya ay miyembro ng Philippine National Police Academy (PNPA) “Sandigan” Class of 1994.
