ANG DENR National Capital Region, sa pamamagitan ng Conservation and Development Division (CDD), ay nagsagawa ng regular greenspace/river assessment at urban biodiversity monitoring noong ika 25-26 ng Abril, sa mga piling lugar sa Lower Marikina ng Marikina River Basin (MRB) sa Marikina City at sa La Mesa Watershed Reservation (LMWR) sa Quezon City.
Ang aktibidad ay idinisenyo upang suriin ang biophysical na kondisyon nang nasabing watershed at tinatawag na sub watershed sa Metro Manila. Ito ay karaniwang isinasagawa pagkatapos ng tag-ulan at tagtuyot na panahon. Ang assessment ay kumakalap ng biophysical characterization na kinabibilangan ng pagkolekta ng pangunahing data sa lupa, streamflow, flora, at fauna sa loob ng tatlong (3) natukoy na permanenteng monitoring sites na itinatag sa MRB at LMWR.
Ang Lower Marikina ay isang bahagi sa MRB na tumatawid sa Region IV-A (CALABARZON), sa NCR, at isang bahagi ng Region III. Ito ay isa rin sa pangunahing pinagkukunan ng tubig, alinman mapatubig-tabang o feeding groundwater, sa kabila ng kasalukuyang kalagayan nito.
Ang LMWR naman ay matatagpuan sa hilagang bahagi ng Metro Manila na sumasaklaw sa Quezon City at Caloocan City. Ang Reservoir na ito ang pangunahing pinagkukunan ng maiinom na tubig para sa mga residente sa Metro Manila at mga kalapit na probinsya, pati na rin ang tahanan ng maraming katutubo at endemic species ng flora at fauna.
Hinihikayat ng DENR-NCR ang mga stakeholder na patuloy na protektahan at pangalagaan ang biodiversity sa loob ng watershed at sub watershed upang patuloy na makapagbigay ng mga benepisyong panlipunan, pang-ekonomiya, at kapaligiran dahil sinusuportahan nito ang marami sa mga bahagi ng mga serbisyo ng ecosystem mula rito.
