TULUY-tuloy ang pagpaplano at ginagawang hakbang ng Department of Tourism (DOT) na layong mapaunlad ang tourism industry sa Pilipinas.
Ito ang pagtitiyak ng DOT sa oras na maitayo na ang mga tourist rest areas sa mga strategic location sa Luzon, Visayas, at Mindanao.
Sa kaniyang Facebook page, ibinida ni Tourism Secretary Christina Frasco ang magiging itsura ng mga tourist rest areas.
Ayon kay Frasco, ang mga pasilidad ay gagamit ng mga lokal na materyales at design elements na magtatampok sa Filipino brand.
“The Tourist Rest Areas will also adopt the use of local materials and design elements that herald the Filipino brand,” pahayag ni Frasco.
Aniya, ipatatayo ang mga ito sa pamamagitan ng Tourism Infrastructure and Enterprise Zone Authority (TIEZA) ng kagawaran katuwang ang mga lokal na pamahalaan.
“We are implementing this in partnership with the Tourism Infrastructure and Enterprise Zone Authority (TIEZA) and with the support of the local government units all over the country,’ ayon kay Frasco.
Sampung rest areas ang ipatatayo ng kagawaran sa buong Pilipinas.
Sinabi ni Frasco na ang mga nasabing pasilidad ay seserbisyuhan ang mga turista na nangangailangan ng accommodation, information, safety at security.
Aniya, ang bawat tourist rest area ay mayroong pasalubong center na magtatampok ng mga produktong lokal.
“These areas will serve the travelers in need of accommodation, information, safety, and security. It will also have a pasalubong center inside, displaying our local products, highlighting the Filipino artistry,” aniya pa.
Una na ring ibinahagi ng DOT na ilulunsad nila ang kanilang tourism hotline sa katapusan ng 2022 upang tutugon sa anumang request para sa impormasyon at assistance na kinakailangan ng mga turista.
