SUPORTADO ng mga senador ang panukalang palawakin at palakasin ang papel ng Movie and Television Review and Classification Board (MTRCB), kabilang ang kapangyarihang harangan ang mga hindi naaangkop na nilalaman sa mga video streaming platform na hindi akma sa moral values ng mga Pilipino.
Inihayag ni Sen. Chiz Escudero ang kaniyang suporta sa mga debate sa plenaryo araw ng Martes sa 2024 General Appropriations Bill (GAB) kung saan tinalakay ang budget ng MTRCB.
Humingi si Escudero ng paglilinaw sa kapangyarihan ng MTRCB na ipagbawal ang mga X-rated na pelikula online mula kay Sen. Jinggoy Estrada na siyang nagdedepensa sa budget ng nasabing regulatory body para sa susunod na taon.
Ayon kay Estrada, maaari lamang ipagbawal ng MTRCB ang mga paksang pelikula o pelikula sa pampublikong palabas sa mga sinehan at telebisyon sa ilalim ng Presidential Decree 1986 na lumikha ng MTRCB, at Republic Act 9775 (Anti-Child Pornography Act).
Gayunpaman, sinabi ni Escudero na walang kapangyarihan ang kinatawan na ipagbawal ang mga X-rated na pelikula mula sa pampublikong eksibisyon sa internet.
Ipinunto rin niya na wala sa kakayahan ng Department of Information and Communications Technology (DICT) na tiyakin na hindi dapat payagan ang ilang nilalaman o site.
“The point I am driving at is that it is not within the core competence of the DICT and I think at some point in time the MTRCB should be brought into the picture either via the bill of Sen. (Robinhood) Padilla or by an amendment to the law,” ayon kay Sen. Chiz Escudero.
Hinikayat naman ni Sen. Alan Peter Cayetano ang MTRCB na bumuo ng isang research arm na magsasaliksik kung paano mapapalawak ang mandato nito sa ilalim ng batas upang masakop ang iba’t ibang digital platforms, kabilang ang Netflix.
Nilinaw ni Cayetano na ang layunin ay hindi upang mag-censor, kundi upang matiyak na ang mga kabataang Pilipino ay hindi kumokonsumo ng mga palabas na mararahas, mahahalay, o labag sa moral ng mga Pilipino.
Aniya, lalong mahalaga ito ngayong panahon kung kailan laganap na ang ilegal na droga, teenage pregnancy, at sexually transmitted diseases.
Nauna rito, ibinunyag ni MTRCB Chairperson Lala Sotto-Antonio na sa limitadong hurisdiksiyon nito sa kasalukuyan, maaari lamang magrekomenda ang ahensiya habang ang DICT o National Telecommunications Commission (NTC) ang may kapangyarihang mag-utos na tanggalin ang mga hindi naaangkop na nilalaman.
Sa Senado, may limang panukalang nakabinbin, kabilang ang Senate Bill No. 1940 (MTRCB Act of 2023) na inakda ni Padilla, chairperson ng Senate Committee on Public Information and Mass Media.
Sa panukalang batas ni Sen. Padilla, nais nitong tugunan ang nagbabagong pangangailangan ng kasalukuyang panahon.
