Libreng sakay, handog ng MMDA sa mga maiipit ng transport strike

Libreng sakay, handog ng MMDA sa mga maiipit ng transport strike

TINIYAK ng Metro Manila Development Authority (MMDA) na magbibigay sila ng libreng sakay sa mga pasaherong inaasahang mai-istranded sa ikinakasa na namang transport strike ngayong araw.

Inihayag ni MMDA Chairperson Romando Artes na mayroon silang contingency measures o mga hakbang upang hindi maabala ang mga commuters ng transport strike ng Pinagkaisang Samahan ng mga Tsuper at Operators Nationwide (PISTON).

“Agency buses and trucks will be prepositioned to provide free rides to commuters and transport them to the EDSA Bus Carousel. “Libreng Sakay” signage will be attached to vehicles so that the public can easily identify them,” pahayag ni Artes.

Aniya, nakahanda na para sa deployment ang 20 sasakyan, kasama ang 11 commuter vans, anim na buses, at tatlong military trucks.

Sinabi pa ni Artes na imomonitor ng Metrobase sa pamamagitan ng CCTV cameras ang mga pangunahing kalsada sa Metro Manila na maaapektuhan ng tigil-pasada para naman sa quick dispatching ng “Libreng Sakay” vehicles.

Magde-deploy din sila ng traffic personnel at Road Emergency Group members sa iba’t ibang bahagi ng National Capital Region para tulungan ang mga motorista at commuters na maaapektuhan ng transport strike.

“Our personnel are ordered to manage traffic and provide assistance to commuters during the transport strike,” ani Artes.

Samantala, magseserbisyo rin ang Pasig River Ferry Service, bilang alternatibong transportasyon sa mga pasahero na may operasyon mula Lunes hanggang Sabado.

Follow SMNI News on Twitter