PORMAL nang nagretiro si Philippine Marine Corps Commandant Major General Nestor Herico matapos ang 38 taon na serbisyo sa militar.
Isang seremonya ang inihandog kay MGen. Herico sa pangunguna ni Philippine Navy Flag Officer-in-Command, Rear Admiral Adeluis Bordado sa Philippine Marine Corps Headquarters sa Fort Bonifacio sa Taguig City.
Kasabay nito, binigyan ng parangal ni Bordado si Herico dahil sa ipinakita nitong kahusayan sa pamumuno at propesyonalismo sa paglilingkod sa bayan.
Sa mahabang panahon sa militar, ilang matataas na posisyon ang hinawakan ni Herico na naging daan para siya ay mabigyan ng mga pagkilala kabilang ang Presidential Merit Medal at Philippine Legion of Honor Degree of an Officer.
Iiwan ni Herico ang Philippine Marines na isinusulong ang pagpatutupad ng Archipelagic Coastal Defense Strategy, habang pinalalakas ang ugnayan sa international partners.
Si Herico ay nagmula sa Zamboanga City at miyembro ng Philippine Military Academy (PMA) “Maringal” Class 1988.
Itinalaga naman si Brigadier General Raul Jesus Caldez bilang acting Commandant ng Philippine Marines.
