INAASAHAN ang pag-upo sa mga bagong puwesto ng ilang high-ranking officers ng Armed Forces of the Philippines (AFP) matapos lagdaan ni Pangulong Ferdinand R. Marcos, Jr. ang kanilang appointment.
Kabilang dito si Lieutenant General William Gonzales na uupo bilang bagong Commander ng AFP Western Mindanao Command (WestMinCom), kapalit ni Major General Steve Crespillo na magsisilbi bilang bagong Inspector General ng AFP.
Si Major General Gabriel Viray III na mamumuno sa 1st Infantry Division ng Philippine Army ay papalitan bilang Deputy Chief of Staff for Civil-Military Operations, J7 ni Brigadier General Arvin Lagamon, commander ng Civil Relations Service ng AFP.
Habang si Brigadier General Ramon Zabala ang bagong hahawak sa Civil Relations Service ng AFP matapos ipasa ang pamumuno sa Presidential Security Group kay Brigadier General Jesus Nelson Morales, kasalukuyan deputy commander ng Air Logistics Command.
Samantala, si Brigadier General Edmundo Peralta ang magsisilbi bilang bagong pinuno ng Intelligence Service ng AFP.
Ang mga opisyal ng militar ay sinuri ng AFP Board of Generals at inendorso ni Defense Secretary Gilberto Teodoro Jr. kay Pangulong Marcos Jr.