IKINATUWA ng fans at netizens ang pagtupad ni Moira dela Torre sa kahilingan ng isang fan nito sa “pagpapa-sabuy” nito ng danggit sa kanyang idinaos na concert sa Qatar.
Sa kalagitnaan ng kanyang show sa Asian Town Amphitheatre, ibinunyag ni Moira na ginawa niya ang kahilingan ng isang fan na nagtanong kung pwedeng magpabili rito ng danggit mula sa Pilipinas.
Inimbita ni Moira ang kanyang fan sa stage kung saan niya ibinigay ang danggit sa masuwerteng fan.
Sinabi naman ng fan na ilang taon na siyang hindi nakakauwi ng Pilipinas at nagpapasalamat siya kay Moira dahil sa kabutihan nito.
Nang tanungin naman ng fan kung magkano ang utang nito kay Moira ay sinabi nitong hindi na nito kailangang magbayad dahil malaki na ang pasasalamat niya sa pagdalo nito sa kanyang sold-out concert.
