TARGET ngayon ng kaliwa’t kanang pag-atake sa social media ang chairperson ng Movie and Television Review and Classification Board (MTRCB) na si Lala Sotto.
Sa press release na inilabas ng board ng MTRCB, inihayag ng vice chairman nito na si Njel de Mesa na patuloy na inuulan ang kanilang official pages ng mga banta mula sa netizen tulad ng rape at death threats laban kay Sotto.
Maging ang SMNI News ay ginamit din ng mga naninira laban sa chairperson.
Nanindigan naman ang pamunuan ng SMNI na ito ay peke at pinaalalahanan ang publiko na paniwalaan lamang ang mga post mula sa mga legitimate news agency.
“Over the past weeks, we have experienced an unfortunate surge in threatening messages on our official social media pages, including explicit rape and death threats directed at Chairperson Lala Sotto,” pahayag ni MTRCB Vice Chairman Njel de Mesa.
Matatandaang, sinuspinde ng MTRCB ang It’s Showtime ng ABS-CBN sa loob ng 12 araw dahil sa umano’y “indecent acts” ng mga TV host nito na sina Vice Ganda at Ion Perez sa segment ng show na “Isip Bata” kung saan makikitang kumakain ang dalawa ng icing gamit ang mga daliri.
Maraming netizen din ang nagreklamo sa ginawa ng mga TV host
Dinepensahan ni De Mesa si Sotto at sinabing isang tapat na lingkod-bayan ang chairperson.
“Chairperson Lala Sotto is a dedicated public servant who has spent her career advocating for responsible and inclusive media content,” dagdag ni De Mesa.
Aniya, patuloy na itinataguyod ni Sotto ang kahalagahan ng media content na rumerespeto sa kultura habang positibong nag-aambag sa Philippine entertainment industry.
“She has consistently championed the importance of media content that respects cultural sensitivities while contributing positively to the Philippine entertainment industry,” aniya.
Online attacks vs MTRCB chairperson Lala Sotto, kinondena ng Board
Batay pa sa pahayag, mariing kinokondena ng MTRCB Board ang anumang uri ng banta, panggigipit, o karahasan, online o offline man.
“While the MTRCB recognizes the importance of constructive criticism and open dialogue, it strongly condemns any form of threats, harassment, or violence, both online and offline. Such behavior is not only illegal but also runs counter to the principles of a Filipino value-based media and entertainment culture that the MTRCB upholds,” ayon sa MTRCB Board
Naninindigan din ang Board na mananatili itong tapat sa misyong tiyakin na ang nilalaman ng telebisyon at pelikula ay naaayon sa cultural values ng mga Pilipino.
“The MTRCB remains steadfast in its mission to ensure that television and movie content aligns with the cultural values and norms of the Philippines,” ayon pa sa MTRCB Board.
Hinihikayat din ng MTRCB na magkaroon ng maayos na dayologo at diskurso sa publiko at binigyang-diin ang kahalagahan ng diskurso at responsableng pagpuna.
“We continue to encourage constructive dialogue with the public, emphasizing the importance of civil discourse and responsible criticism,” dagdag ng MTRCB Board.
Pagsampa ng kaso ng KSMBPI vs Vice Ganda, Ion Perez, walang impluwensiya ng MTRCB—Chairperson
Samantala, sa isang pahayag, nilinaw ni Sotto ang ilang larawan na nag-circulate online kaugnay sa courtesy call ng Kapisanan ng Social Media Broadcasters ng Pilipinas, Inc. (KSMBPI) sa MTRCB Office noong Agosto 24.
Ayon kay Sotto, ang naging pagbisita ay upang magbigay ng suporta ang KSMBPI sa layunin ng MTRCB, na welcome naman sa ilalim ng PD 1986.
“The purpose of this visit was to express their support for our efforts in monitoring film and TV broadcasts, recognizing that the MTRCB operates as a small agency with limited manpower. Thus, the MTRCB welcomes their expression of support on ensuring responsible and quality content in the entertainment industry in line with our mandates under PD 1986,” pahayag ni MTRCB Chairperson Lala Sotto.
Dagdag pa ni Sotto, una nang sinabi ng KSMBPI na ang desisyon nitong magsampa ng kaso ay hindi naimpluwensyahan ng MTRCB kaya hindi dapat bigyan ng maling interpretasyon.
“As stated by the KSMBPI, its decision to file a case “was never triggered nor influenced in any way by the MTRCB. We urge everyone not to interpret these photos with any malicious intent,” saad ni Sotto.
Ang KSMBPI ay ang grupong naghain ng criminal complaint laban sa mga TV host ng It’s Showtime na sina Vice Ganda at Ion Perez, kasunod ng “icing scene”, na anila’y labag sa Section 6 ng Article 201 ng Revised Penal Code at Republic Act No. 10175 o ang Cybercrime Prevention Act of 2022.