PINASALAMATAN ng job order at contractual workers sa buong bansa si Pangulong Ferdinand R. Marcos Jr. dahil sa ipinagkaloob nitong P5,000 yearend bonus para sa sektor.
Sa impormasyon na ipinaabot ni Department of Social Welfare and Development (DSWD) Usec. Alan Tanjusay na dating tagapagsalita ng labor group na ALU-TUCP, masayang tinanggap ng temporary government employees ang yearend bonus.
Ang kautusang magbigay ng yearend bonus ay nakapaloob sa Administrative Order 3 ni Pangulong Marcos na nagpapahintulot sa lahat ng ahensiya sa executive branch pati na ang local government units na magbigay ng one-time pro-rated gratuity pay sa lahat ng temporary workers nitong 2022.
Sa bahagi naman ng DSWD, saad ni Tanjusay na inaprubahan ni OIC-Secretary Edu Punay ang pagbibigay ng gratuity pay sa higit 16,000 job order at contract of service employees.
Saad ni Tanjusay na malaking bahagi sa workforce ng DSWD ang job order at contractual workers sa pagbibigay-serbisyo publiko sa mga Pilipino.
“This cash incentive is a recognition of their contribution and definitely a boost to the morale of public sector job orders and contracts of service workers,” ani Tanjusay.
